نصائح الدراسة للناس المحتاسة

أولا أنا مش عايز خنقة..هتلاقوا معظمها أو كلها حاجات أنتم عارفينها..ذنبي إيه يعني هو أنا هأجيب لكم كل سنة حاجات مختلفة ولا إيه...

المهم...

وأهم حاجة النية....الحمد لله أنتم حفظتوها دلوقتي...

قلنا من أهم النوايا:

1)مثال -وقدوة -للمسلم الملتزم بديته والمتفوق في دراسته
2)مسلم متفوق يفيد أمته ((خدمة الإسلام و المسلمين))

3) طلب العلم..
والموضوع ده محيرني..
لأني حسب ما سمعت أن فيه شيوخ أجلاء بيقولوا أن أحاديث العلم هذه للعلم الشرعي فقط
ولكن الشيخ أبي عمار كان قال أن حديث ((من سلك طريقا يلتمس فيه علما)) كلمة علما جاءت نكرة فتفيد العموم والشمول..يعني أي علم نافع
((طبعا مش عايز مرح يتعلم موسيقي مثلا ويقول ده علم نافع))

4)رضا الوالدين وإن شاء الله يؤدي إلي رضا الله تعالي
5)الدعوة بالفعال عامة ((لما تبقي مسلم متفوق والناس تشوفك كده تبقي دعوة في صمت إن شاء الله)) شبه أول نية بس دي أعم شوية
6)من أجل الحصول علي عمل بعد التخرج إن شاء الله و بالتالي الكسب الحلال وعفة النفس ((جديد !))

لو حد عنده نية تانية يقولها لنا...

بعد كده الأسئلة الظريفة اللي كنت كتبتها في موضوع ((النية يا شباب !))...ومعلهش علي التكرار..

بنذاكر وبننسي ومنحلش في الامتحان؟؟..يعني من الآخر منذاكرشي ونريح نفوخنا..


غلط !!
عارف ليه؟؟
أولا: أنت مش بتنسي 100% ...((أوعي تكذب يا خلبوص))
ثانيا:برضه بتحل شوية في الامتحان مش بتسيبه أبيض يعني ((أوعي تكذب يا خلبوص))
ثالثا: أنت لما تحتسب نية المذاكرة بإذن الله تكون في ميزان حسناتك...يبقي بتاخد ثواب المذاكرة...وربنا يقدرك في الامتحان..
رابعا:اصدق الله يصدقك...ادع الله أن يوفقك والمسلمين
خامسا: لا تنس الأخذ بالأسباب...يعني أنت لو مذاكرتش تبقي بتتواكل...و أكيد ده عدم أخذ بالأسباب...
سادسا:ارض بقضاء الله يا أخي...رفعت الأقلام وجفت الصحف



دراسة الكلية ملهاش لازمة أصلا ومش عايزين نتكلم...أنت مش عارف دول بيتخدوا إيه في البلاد التانية..

طيب..اهدي بس كده...
أكيد طبعا ليها لازمة...بس حتي يا أخي بفرض إن ملهاش...إيه الحل قدامك؟؟

طب ما هي خطوة لابد منها...اتعلم واتخرج وبعد كده ربنا يوفقك ابقي زود مهاراتك وعلمك بطرق أخري غير الكلية اللي مش عاجباك..
صح ولا غلط؟؟



الحمد لله
بصراحة كنت ناوي أنقل لكم نصائح الشيخ أبي عمار من درس ((حوار مع طالب))..بس للأسف مش لاقي الورقة..
طيب...اللهم اجعل نيتي خالصة لوجهك الكريم...نية : الدعوة

أنا هأكتب والله المستعان

((برضه أنتم فاهمين أني واقع في الحاجات اللي بأكتبها مش مشكلة))

- أخي تفوقك مهمممممممم جدا لنا...بالله عليك لا تعجل المذاكرة لها أقل أولوية......لا تقدم عليها ما هو ليس أفضل منها..
اجعل لها وقت محترم في يومك...

- أخي ومن الجهة الأخري إياك ثم إياك ثم إياك أن يخدعك الشيطان ويخليك تتحجج بالمذاكرة فتفضلها عن الصلاة في المسجد ((أو الصلاة في اول وقتها للأخوات))..أو يخدعك ويخليك تسيب ورد القرآن بحجة أن مفيش وقت...صدقني دي خدع عملها معانا كتير قبل كده...

- أخي...أنت تعبد الله...تصلي لله...تؤدي النوافل لله....تقرأ القرآن لله تعالي..
وأنت تذاكر -إن شاء الله - لله تعالي...
وبعد كل ذلك الله هو من يوفقك بإذنه ورحمته...
يعني ملناش حجة...لا تتواني في عبادة ربك....

- أخي لا تنس الدعاء..ادع ربك لك..وادع لأخوانك من المسلمين.....حتي بدون أن يقولوا لك..
حتي يقول لك الملك ولك بمثل ((فيما معناه))

- أخي..من لم يحمل هم الدعوة فهو عليها هم..
انوي الدعوة وأنت ذاهب للكلية..
يعني مش هتتعب إن شاء الله لما تحفظ حديث سهل وتروح تقوله لأي واحد صاحبك ((أو واحدة صاحبتك طبعا لو أنت بنت))

أنا الحمد لله كنت حفظت حديث -قال رسول الله صلي الله عليه وسلم : ((كلمتان خفيفتان علي اللسان ثقيلتان في الميزان حبيبتان إلي الرحمن سبحان الله وبحمده سبحان الله العظيم)) متفق عليه - ولما آجي أقوله لحد وأنا فرحان بقي ومنشرح الصدر -ما شاء الله حلاوة جامدة - وهو يكمل الحديث قبل أنا ما أقول..ويقول "سبحان الله وبحمده سبحان الله العظيم" -وهو المطلوب ! - ويقول لي أنت أول مرة تعرف الحديث ده ولا إيه.............ما شاء الله حلاوة الدعوة ....

- أخي..بالنسبة للمظهر..اهتم بمظهرك الحسن بلا إفراط ولا تفريط..
يعني الولد مثلا يلبس لبس كويس....نظيف..يسرح شعره...مقلتش كل يوم لبس جديد بس قصدي بنية ((إن الله جميل يحب الجمال)) وبنية ((النظافة والإسلام حث عليها))...أوعي تكون بنية أنه يعجب فلانة اللهم احفظنا..

بانسبة للأخوات طبعا يحترسن من وضع أي رائحة...أو أن ينقلب الأمر إلي التبرج والعياذ بالله...
كلمة الأخت موني: (( وطبعاً مينفعش الشياكه الزياده أوى لإن فى نفس الأيه فى " ولا يبدين زينتهن "
يعنى كتير بيقولوا لازم نبقى شيك جدا عشان نحبب البنات فى الحجاب ..
جميل بس فى نفس الوقت ممكن تفتنى حد تانى
وده ميمنعش إن يكون المظهر العام كويس يعنى .. بس بمقدار ميلفتش الإنتباه ,,))

- طبعا الحمد لله مش محتاج أحذركم من الاختلاط..الحمد لله ..

- كمان أخوتاه مساعدة الغير...يعني لما أخ-لو أنت ولد - أو أخت -لو حضرتك بنت - يطلب منك مساعدة ما..قصدي يعني في الدراسة...جزء مش فاهمه مثلا أو حاجة فاتته .......إلخ..
المفروض تفرح !!! لأن أنت اللي هتستفيد بإذن الله...
قال رسول الله صلى الله عليه وسلم (( المسلم أخو المسلم: لا يظلمه ولا يسلمه، من كان في حاجة أخيه كان الله في حاجته، ومن فرج عن مسلم كربة فرج الله عنه بها كربة من كرب يوم القيامة، ومن ستر مسلما ستره الله يوم القيامة)) متفق عليه.

- نقطة كمان...عايزك تفتكر أن والدك بيتعب قد إيه علشان يكسب الرزق الحلال اللي بيصرفه عليك وعلي دراستك...كتب وكشاكيل ومواصلات و ورق و.........إلخ..
بالله عليك كن عند حسن ظن أبيك...ما يبقوش هم بيصرفوا عليك وأنت ولا هامك...

- بالنسبة لأسلوب المذاكرة مش هأفيدك فيه أوي...بس حاول تشوف إيه الأسلوب اللي بينفع معاك أكتر...
يعني الكتابة ولا القراءة والصوت ولا........
زطبعا النصيحة الشهيرة...ذاكر أول بأول علشان ما يتأحلشي عليك مذاكرة ((ابقي قابلني لو ما اتأجلش))

يبدو أنني طولت أوي ..
والموضوع مش ممتع أوي مش عارف ليه.. -_-

أسأل الله الإخلاص في القول والعمل...
والحمد لله رب العالمين...

بقلم أخينا مبتدئ-جزاه الله خيرا-

اولا-العنوان-مضحك-جدااا
ثانيااا-يعني-ايه-كلمة-خلبوص-دي
على-العموم-شكرااا-على-الموضوع-الجميل-ده
يا-قمر

جزاكم الله خيرا

جزاك الله كل خير اختيوبارك فيكي

السلام عليكم ورحمة الله وبركاته،،

جزاك الله كل خير ويحتسبه الله لك فى ميزان حسناتك وانت على فكره ولا طولت ولا حاجه والموضوع مش ممكل خالص بالعكس كلامك مشوق ولذيذ.
شكراً لك اخي الكريم
[color=crimson]

وعليكم السلام ورحمة الله وبركاته

جزانا واياكم جميعا اخوتاه

ونفع الله بنا وبكم يارب

وجزاالله- أخانا الكريم مبتدئ -خيرا على هذه النصائح الطيبة
جعلها الله في موازين حسناته

موضوع حلو اوي و على فكرة اسلوبه في الكتابة شيق جدا

جزاكي الله كل خير و ايضا جزى الله الاخ مبتدئ كل خير عشان هى بجد نصايح جميلة جدا

الموضوع جميل
ياريت تفضلي كده علطول

جزانا واياكم أختاه




تسلمي يا غالية

بس ده مش أنا اللى كاتبة الموضوع

من النصائح الهامه فى الدراسة
اتخاذ الهدف من الدراسة
وهذا ما ينساه الكثير منا

لا بجد ممتع اوي .. و جميل جدا و الله
و جزاك الله كل خير ... و جعله في ميزان حسناتك

بارك الله فيكم